2 Keunenks 20
01In dij tied wer Hizkia slim zaik, t was sikkom mit hom gebeurd. Profeet Jesaja, zeun van Amos, ging noar hom tou en zee: "Dit zegt de HEER: Stel odder op zoaken, want ie zellen staarven en nait weer beter worden."
02Hizkia ging mit zien gezicht noar muur tou liggen en beedde de HEER:
03"HEER, vergeet toch nait dat ik altied oprecht en van haarten eerlek veur joe leefd heb. Aaid heb ik doan wat goud was in joen ogen." En hai begunde haile bot te reren.
04Jesaja was nog nait van binnenplaain vandoan, of hai kreeg dit woord van de HEER:
05"Goa weerom en zeg tegen Hizkia, keunenk van mien volk: 'Dit zegt de HEER, God van joen veurvoader David: Ik heb joen beden heurd en joen troanen zain. Nou den, k zel joe weer beter moaken. Over drij doag zel ie weer opgoan noar de HEER zien hoes.
06Ik geef joe nog vieftien joar te leven en ik zel joe en dizze stad redden oet greep van keunenk van Assyrië. Om miezulm en om mien knecht David zel ik dizze stad beschaarmen.'"
07"Hoal mie n plak dreuge viegen," bestelde Jesaja. Dat deden ze en ze legden dij op t zere stee. Dou monterde Hizkia weer op.
08Nou haar e aan Jesaja vroagd: "Krieg ik van de HEER ook n taiken te zain, dat e mie beter moaken zel en ik over drij doag weer opgoan zel noar t hoes van de HEER?"
09"Joa," zee Jesaja, "de HEER zel joe n taiken geven dat e doun zel wat of e zegd het. Mout dij schaar doar, tien streep veuroet goan of tien streep achteroet?"
10 "Tien streep veuroet is niks biezunders," zee Hizkia. "Mor tien achteroet aal."
11 Profeet Jesaja raip de HEER aan en dij dee schaar op Achaz zien zunnewiesder tien streep achteroet goan.
12 In dij tied stuurde Berodach-Baladan, Baladan zien zeun, keunenk van Babylonië, ofgezanten mit n braif en geschenken veur Hizkia, want hai haar vernomen dat e lebait was.
13 Hizkia heurde heur bosschop aan en luit heur zien haile schathoes zain: t zulver, t gold, de kruderijen, de beste eulie, en ook zien woapenkoamer en aal wat ter in zien schatkoamers te vinden was. Der was niks in zien haile pelaais of in zien riek dat Hizkia heur nait zain luit.
14 Profeet Jesaja ging noar keunenk Hizkia tou en vruig hom: "Wat veur bosschop haren dij manlu en woar kwammen ze heer?" "Oet n laand hier wied vandoan," zee Hizkia, "oet Babylonië."
15 "Wat hebben ze aalmoal in joen pelaais te zain kregen?" vruig Jesaja. "Aal wat in mien pelaais is, hebben ze zain," zee Hizkia, "Der is niks in mien schatkoamers dat ik heur nait zain loaten heb."
16 Dou zee Jesaja tegen Hizkia: "Luster noar de HEER zien zeggen:
17 Der komt n tied dat aal wat ter in joen pelaais te vinden is en aal wat joen veurvoaders aan nou tou bie nkander zammeld hebben, votsleept worden zel noar Babel tou. Niks blift ter van over - zegt de HEER.
18 Van joen aigen zeuns, joen aigen vlaais en bloud, zellen ze gounent mitnemen en dij zellen dainstdoun mouten aan t hòf van keunenk van Babylonië."
19 "t Woord van de HEER dat ie sproken hebben, is goud," was Hizkia zien beschaaid. Mor hai dochde bie zokzulm: t Is mie aingoal, as ter in mien tied mor vree en vaaileghaid is.
20 Geschiedenis van Hizkia en aal zien grode doaden, en hou of e viever en wotterlaaiden aanlegd het en zo wotter in stad brocht, staait aalmoal optaikend in kronieken van keunenks van Juda.
21 Hizkia ging bie zien veurolders te rusten en zien zeun Manasse wer keunenk in zien stee.
|
